اشتاق وقول إنك مشتاق. متتكسفش من مشاعرك.. قول للي بتحبه بحبك، كل سنة

كل سنة وفي نفس اليوم ونفس الساعة موعد ميلادك، بتحتفل بيه من وإنت طفل في وسط أصحاب أو لمة وأهل، كيك وشمعة وأمل جديد وأماني وأحلام بتمنّى تحققها.

كل سنة بتعدي عليك بتفقد ناس غالية وبتعرف ناس بتشيلهم جوة قلبك وبترسمهم بعيونك وبيكونوا سر بقائك وحيويتك لبكرة، بتحلم معاهم وبيشاركوك في الحلم والحياة الجديدة.

مع كل شمعة بتنطفي كل سنة بتطفي ذكرى سيئة وتمسح دمعة، وبتقوى أكتر عشان تكمل في الدنيا، بتلاقي أسباب أكتر للبقاء، بتزداد نضوج وثبات، بتعرف اللي ليك واللي عليك، بتقدر تمسح دموعك بإيدك، وتداوي آلامك بنفسك.

كل سنة بتعدي عليك بتعرف قيمة ذاتك وإزاي تقدّرها، بتعرف إزاي مترهقش نفسك ولا قلبك مع ناس ترمومتر المشاعر عندها عطلان، يمكن مع كل سنة بتلتزم الصمت أكتر وتبطل تعاتب. دايرة أصحابك وحبايبك بتقل وبتقتصر على الأوفى والأصدق، بتعرف إن مش أي حد يتسمى صديق.

مع كل يوم بتعرف تحاسب على قلبك من الوجع، بتعرف أدوات الوقاية وبتحمي نفسك من آفات البشر، وبتعرف إن الأفعال خير من الكلام، بتبعد عن العلاقات الفاشلة المرهقة، بتكون محظوظ أكتر لو رزقت بحب يسكن قلبك وتسكن إليه، قلب بيحترم غيابك قبل حضورك ويصونك ويعرف إنك غالي، عين بتفهمك من نظرة من غير ولا كلمة، قلب بيحس وبس.

بتكبر شوية وتفهم حبتين إن أهلك همّ إنت، وإنك لازم تحافظ على الحبل والصلة والرحمة والمودّة اللي بينكم، وإن ليهم معاملة غير أي حد على الكوكب.

وبتكبر وبتفهم إنك لازم تشتغل ولازم تبقى مؤثر في مكانك، بترفض سياسة التسليم ويبقى الحال على ما هو عليه، بتعرف تقول لأ امتى، وليه تقول حاضر.

عيد الميلاد مش كيك ولا شمعة ولا لمة حلوة وأغاني، عيد الميلاد تقييم سنوي ليك كشخص مسؤول ناضج واعي يعرف الثواب والعقاب، شخص يعرف يقود ذاته أولاً من أجل قيادة أي شخص أو شيء آخر، احتفل كل سنة واوعاك تزعل على سنة راحت ولا أشخاص اختارت الغياب والبُعد، انجح في مجالك واثبِت للي حواليك إنك قدها، وإنك مكمّل رغم الصعب، استمتع بكل دقيقة بتعدِّي من عمرك لأنها مش هترجع تاني.

ازعل.. ابكي.. متزعلش على حد خلاك تبكي.. اشتاق وقول إنك مشتاق. متتكسفش من مشاعرك.. قول للي بتحبه بحبك، كل سنة وإنت قلبك طيب.